بقايا بقايا

الأحد، نوفمبر ٠٤، ٢٠٠٧

إل مايشترى ..يتفرج!0

بسم الله الرحمن الرحيم

من أكثر الأشياء التي تغيظ المرء أن يندمج أو يحاول الاندماج مع برنامج ما ثم يصرف انتباهه إلى شريط الشات أسفل الشاشة , ليجد رسائل غريبة وعجيبة ومريبة الحقيقة ,إن لم تدع إلى الغيظ فتدعوا إلى الغيظ أيضاً .
انتويت كتابه هذا البوست من فترة طويلة , ولكن آثرت جمع بعض الرسائل لعرضها على سبيل المثال , وبما أنى لا املك الوقت الكافي لتتبع هذا الشريط فالجود بالمجود ولنبدأ على قناة دريم 1 مثلاً :

"هاى ,حد يحب يتعرف ع بنوته محترمه . روشه . المنصورة "
المضحك أنها بنوته محترمه , طيب ياست المحترمة عاوزه تتعرفي ازاى على أي أي حد , وما العائد من اضافه محترمه إلى روشه إلى حد عاوز يتعرف .. أشعرتني أن هناك سوق وتنادين على بضاعتك وتقولي عندنا من كله يااستاذ بس أنت شرفنا وشوف ! .. فهل ينص الاحترام على العرض المبتذل هذا ؟!

"أنا 25 سنه شغال والحمد لله ومحترم وخجول (وليد ) "
والحق أنى انتظرت " أكمل هذه العبارة " على اعتبار الرسالة لا تقدم جديد , فماذا استفدنا ياسيد وليد من كونك محترم وشغال وخجول .. إيه المطلوب يعنى ؟!.

" هاى أنا مدحت من (أسيوط ) ممكن أتعرف على إنسانه جادة ) "
والسؤال هنا أيضا , جادة فى إيه بالضبط ياسيد مدحت من أسيوط .. جادة في الكلام الفارغ ولا جادة في الزواج ولا جادة فى الاستهبال , ولا جادة فى أي حاجه وخلاص ؟!

قناة الناس :

" أنا أحمد 29 س مصري عاوز زوجه ت بالكنترول "
يااستاذ أحمد 29 سنه عاوز زوجه مشوية ولا مقلية ولا مسلوقة , ويا ترى تحب سلطه مع الطلب أو أي إضافات؟ .. باريت تسجل طلبك في الكنترول ال حضرتك تركت تليفونك فيه !!!.. عشان بس أى زوجه كده عندها طلبك تتقدم لعظمة جناب سيادتك .

" الداعية التونسية : أنا ع 22 س أحفظ ثلث القرآن منقبة أهلي يشتغلون بالتجارة , حرمت من الشهادة الجامعية ".
رسائل الفتيات صورة تدعوا للحزن بالفعل .. أى ضغط تمارسه مجتمعاتنا حتى تصل بالفتاة حد عرض نفسها لمن يجد في نفسه الرغبة فى الحصول على زوجه ..بأى طريقه المهم أن تخرج من طوق الآنسة إلى المدام بأي وسيله المهم يرضى المجتمع وتُرضى عُرفه .

ورداً على الداعية التونسية :
" الداعية التونسية 22س تجى إنتى إلى الرباط في سبيل الله وأخذ بيدك إن شاء الله للجنة ".
!!!!!!!؟؟؟؟؟ وماله تجيلك فى سبيل الله أصل حضرتك جهاد وهى طالبه تجاهد , بس حضرتك نسيت لو فيه اى طلبات تانيه تجيبها وهى جايه الرباط؟! – وجه مفروس -

ورد أخر " إلى الداعية التونسية التونسي عمري 97 أريد سنيه متدينة "
97سنه ؟!!!! .. طيب لو غيرنا الرقمين ممكن يحدث فرق نشوف كده 79 !!! .. يالله
97 سنه لفتاه فى 22 لا حول ولا قوة إلا بالله

وقس أيضا رسائل معناها "أنا فلان أريد زوجه , سيدة أعمال , ميسوره الحال , لديها سكن " وينقصها طبعا وتصرف علىّ ..
هو ضل الراجل ببلاش يعنى ؟! ..أهو زوجه بمنافعها , شقه ومصروف وايه كمان؟ , مش نفسك فى عربيه أكيد نسيت تكتبها لان ده أمر مفروغ منه !.حضرتك دره مكنونه وهى الكسبانه .

وأخر رسالة رفعت فرستى إلى أعلى درجاتها .. تنص على استهجان السيد المحترم مرسلها , للفتيات اللاتي وصلن سن العنوسه –على حد قوله- ويرفضن الارتباط برجل متزوج , اى ترفض العانس أن تكون زوجه تانيه .. فعلا عندك حق يا محترم إزاى البنت تتجرأ وتكون عانس وتتأمر كمان! , ممكن حضرتك تقدم التماس أه التماس مينفعش أنت بتطلب حق ياراجل , تقدم طلب بتطبيق الإعدام شنقاً لمن سولت لها نفسها أن تصبح عانس لأ ولجرأتها كمان مش عاوزه تكون زوجه تانيه , دلع حريم صحيح !!.

****
رسائل بالجملة عن أريد زوجه أريد زوج , وأرسلي رقمك , ورقمي بالكنترول , وأنا عاوز العفة , وأنا عاوزه الستر .. أى منحدر شاهق تكفأ عنه الأمة على وجهها بهذه القسوة وتلك الفظاظة .. وأي تفكير يصل بالرجل أو المرأة حد عرض نفسها أو نفسه على أي شخص والسلام ,, أى شخص يشاهد البرنامج فيعجبه إعلان يتصل ويحصد الجائزة , عريس أو عروس بلا مطالب , والمضطر يركب الصعاب .. وهن وهم مضطرون.. فما أقسى الحال وما أرخصنا .

التسميات: المصطبه

Posted by uogena :: ١٠:٣٨ م :: 8 comments